KOMPANIA GREEN PZZ INVESTE BA RESORT NO VILLA IHA LAUHATA

SISD – LAUHATA, 30 Junhu 2026 – Kompania lokal Green PZZ Timor-Leste kontinua halo investimentu iha setór turizmu liuhusi konstrusaun resort no villa ho padraun internasionál iha área Klise Illu, Aldeia Pissu-Craic, Suku Lauhata, Postu Administrativu Bazartete, Munisípiu Liquiçá.

Informasaun hirak ne’e hato’o husi Xefe Suku Lauhata, Daniel dos Santos ba Equipa Sentru Informasaun Suku Lauhata, Tersa feira (30/06) semana ne’e iha Sede Maumeta foin lalais ne’e.

Xefe Suku Lauhata haktuir projetu ne’e nu’udar parte husi planu investimentu atu dezenvolve indústria turizmu nasional, hodi aumenta atividade ekonomia lokal no kria oportunidade servisu ba komunidade, liuliu ba juventude sira.

“Área tasi ibun iha ne’e potensial tebes ba dezenvolve turizmu, tanba ne’e, ami simu di’ak investimentu ida ne’e atu fó benefísiu ba komunidade no ekonomia lokal,” dehan Lideransa Suku ne’e.

Nia hatutan autoridade suku prontu kontinua servisu hamutuk ho setór privadu hodi promove dezenvolvimentu turizmu. Tanba ne’e nia husu ba komunidade sira atu labele fa’an rai, maibé fó aluga deit hodi bele fó benefísiu ba proprietáriu rai no investimentu iha futuru.

Entertanto Diretór Ezekutivu Green PZZ Timor-Leste, Roni Joel Barreto da Costa, hatete projetu resort ne’e sei kompostu husi hotel, apartamentu, villa, fatin diverte hanesan diskoteka, no mós área ba eventu nasional no internasionál, inklui konferénsia sira.

Nia haktuir konstrusaun sei hala’o iha faze dahuluk maka konstrusaun hotel, ne’ebé previstu remata iha tempu tinan ida resin. Hafoin ne’e sei kontinua ho konstrusaun ba unidade villa hamutuk ruanulo resin lima (25), tuir fali apartamentu ho unidade ruanulo (20).

Roni hatutan desenhu projetu ne’e adapta ho kondisaun jeolójiku área tasi ibun. Tanba ne’e, edifísiu sira sei la aas liu, maksimum andár rua ka tolu deit, atu preserva natureza no atrai turista sira ne’ebé buka ambiente naturál.

“Turista internasionál sira mai Timor-Leste la’ós atu hare edifísiu aas hanesan iha sira-nia rai. Sira mai atu disfruta natureza, no ida ne’e mak ita hakarak promove,” hateten Roni.

Nia mós informa katak área konstrusaun iha fonte bee ne’ebé di’ak no kapasidade natúrál atu sustenta nesesidade projetu, inklui piscina boot ho medida 25 x 15 metrus.

To’o agora, progresu konstrusaun atinji ona entre pursentu ruanulo to’o ruanulo resin lima (20% to’o 25%) ho fundasaun maioria remata ona.

Hakerek Nain        : Equipa SISD – Lauhata

Editor                     : Formador JPD – SEKOMS