Lauhata – Sekretáriu Estadu Komunikasaun Sosiál – (SEKOMS), Expedito Dias Ximenes, Sesta-Feira (03/07/2026), lansa Programa Suku Dijitál iha Suku Lauhata no Maumeta, Postu Bazartete, Munisípiu Liquiça.

Expedito Dias Ximenes hateten, programa Suku Dijitál ne’e atu fasilita Autoridade Suku sira publika informasaun kona-bá atividade no desenvolvimentu saida deit mak hala’o iha suku laran.

Iha era modernu ohin loron, prejensa plataforma online bele fasilita servisu autoridade lokál sira nian no fasil ba komunidade atu asesu ba informasaun.

“Tanba ho avansu teknolójika, oras ne’e dadaun ita moris ho era digital, dala barak karta sira ita sei uza hakerek ho surat tahan mutin entre xefe suku no sidadaun sira no mós presiza lori karta la’o ba la’o mai, no liu husi website, komunidade bele asesu informasaun saida deit mak akontese iha suku laran.” Hateten Expedito Dias Ximenes.

Sekretáriu Autoridade Munisípiu Liquiça, Zito António konsidera, Suku Dijitál nu’udar sentru informasaun ba autoridade no komunidade iha Suku Lauhata no Maumeta, hodi asesu ba informasaun.

“Lansamentu ida ne’e tan, ne’e atu dehan katak, kompleta liu tan nesesidade ne’ebé mak suku sira presiza, atu nune’e atividade sira ne’ebé halo iha ne’e, bele publika ba públiku.” tenik Representante Autoridade Munisípiu Liquiça.

Representante Autoridade Munisípiu Liquiça ne’e mós subliña, liuhusi plataforma ida ne’e, autoridade bele fó resposta ba krítika no lamentasaun sira ne’ebé mosu iha sosiedade nia let, ita bele lalais fó resposta liuhosi mídia, liuhosi website, ita bele fó resposta ba sira.

Xefe Suku Lauhata, Daniel dos Santos, apresia ho programa Nonu Governu Konstitusionál nian hodi estabelese Programa Suku Dijitál iha Suku Lauhata.

“Liuhusi Suku Dijitál ita bele aprende oinsá publika, fó sai ita-nia programa no atividade saida deit mak ita halo iha suku ba iha públiku.” Katak Daniel dos Santos.

Alende lansa programa Suku Dijitál, SEKOMS mós lansa programa Jornal Parede iha Eskola Tékniku Vokasionál Liquiça, Eskola Sekundária Jerál Hu Iso Lara Iso no Eskola Sekundária São João de Brito Católica Liquiça.

Iha lansamentu ne’e, Sekretáriu Estadu Komunikasaun Sosiál mós distribui sertifikadu apresiasaun ba formadu sira ne’ebé kompleta ona Formasaun semana ida kona-bá Programa Suku Dijitál no Jornal Parede.

Notisia: Ekipa SISD Lauhata