Diresaun Protesaun Sivil no Dezastre Naturais Munisípiu Liquiça, lideransa komunitariu suku Lauhata hamutuk ho komunidade aldeia Camalehou; foto Ekipa SISD Lauhata.

Lauhata, 17/08/2026— Diresaun Protesaun Sivil no Dezastre Naturais Munisípiu Liquiça hamutuk Lideransa Suku Lauhata realiza enkontru ho komunidade Aldeia Camalehou hodi divulga informasaun ba komunidade sira antes mosu dezastre naturais. Ita hatene katak wainhira tama ba tempu udan sempre mosu dezastre naturais hanesan; inundasaun, rai halai, udan anin sobu uma, ai-hun bo’ot balun tohar hodi fo ameasa ba ema nia vida. Alende ida ne’e mos diresaun Dezastre naturais husu ba komunidade, la-bele tesi ai-houris ne’ebe satan ba risku rai halai,  sunu rai arbiru, no soe foer arbiru tanba liu husi atitude komunidade nia mos bele kontribui ba risku dezastre naturais.

Xefe Departementu Prevensaun no Informasaun husi Dezastre naturais fahe informasaun kona prevensaun ba komunidade wainhira hasoru dezastre; foto SISD Suku Lauhata.

Tuir Xefe Departementu Prevensaun no Informasaun José Soares, haktuir katak ’’ iha fatin barak mak hau kobre ona inklui fatin ida ne’e, iha tinan kotuk ami mai halo sosializasaun ba komunidade entre suku Maumeta no suku Lauhata maka hanesan Aldeia Darumuda Pú no Aldeia Camalehou konsentra iha area Nun-Matada fo mos informasaun ba komunidade sira ne’ebe fineira rai henek iha mota ninian iha area suku rua refere, hodi prevene ba risku dezastre naturais no ohin ita hasoru malu fali ho komunidade halo tan sosializasaun ho komunidade iha Aldeia ida ne’e atu reforsa tan komunidade oinsá halo prevensaun ba sira wainhira hasoru risku dezastre naturais ita hatene katak tinan-tinan hasoru hela deit dezastre naturais, ita hare’e katak wainhira dezastre mosu la-hatete ba ita no nia mosu ita la-espera atu mosu kalan ka loron ita la hatene. Ita ko’alia kona dezastre naturais iha parte 2 maka hanesan;

1. Dezastre ne’ebe mosu mai husi natureza; maka bai-bain ita hare’e no sente maka hanesan udan, anin, rai halai, rai nakadoko, be’e sae nomos mota tun sobu ema nia uma no natar.
2. Dezastre ne’ebe mosu mai husi hahalok ema nian maka hanesan tesi-ai, sunu rai, soe foer arbiru.”

Iha biban ida ne’e mos Xefe Suku Lauhata Daniel dos Santos, hateten katak “ ita nia sorumutu ba loron ida ohin maka Diresaun Protesaun Sivil no Dezastre Naturais Munisípiu Liquiça, liu husi Departementu Prevensaun no Informasaun mai halo sosializasaun ka fahe informasaun ba komunidade sira oinsá atu ligadu ba dazastre naturais ne’ebe akontese iha ita nia Suku Laran, liu-liu iha area Aldeia Camalehou sempre sai alvu ba dezastre naturais ne’ebe tinan ida ka rua sempre akontese; rai halai no barak liu maka anin sobu uma. No alerta nafatin ba komunidade sira nafatin antisipa bainhira inundasaun mosu atu la-bele fo perigu ba ema nia moris, nomos husu ba komunidade tenki halo evakuasaun ba fatin ne’ebe seguru wainhira mosu dezastre.”

Hakerek Nain                  : Ekipa SISD Suku Lauhata

Editor                               : Francisco dos Santos