KDADALAK: Kuaze agrikultór hamutuk xefi familia 675 iha Munisipiu Ermera no Liquiça hetan apoiu fatin rai fini husi organizasaun parseiru Australian Aid, OXFAM ne’ebé kolabora ho Kdadalak Sulimutuk Institute (KSI).

 Objetivu husi atividade ne’e, atu fasilita agrikultór oinsá bele rai no kuidadu fini ba tempu naruk, tanba maioria agrikultór sira iha area rural laiha fatin ba rai fini, entaun halo agrikutór balun labele rai fini ho di’ak, ne’e duni ho tulun ida ne’e bele ajuda agrikultór sira oinsá bele halo jestaun di’ak ba fini iha tempu naruk.

Area tarjetu ba implementasaun programa ne’e hamutuk suku sanulu (10) ne’ebé kompostu husi Suku lima (5) iha Munisipiu Ermera maka hanesan, Suku Lihu benefisariu hamutuk xefi familia 68, Suku Matata benefisariu hamutuk xefe familia 68, Suku Poetete benefisariu hamutuk xefe familia 68, Suku Ponilala benefisariu hamutuk xefe familia 68 no Suku Leguimea benefisariu hamutuk xefe familia 68.

Nune’e mós, Suku lima (5) iha Munisipiu Liquiça kompostu husi Suku Fahilebo benefisariu hamutuk xefe familia 67, Suku Lisadila benefisariu hamutuk xefe familia 67, Suku Vatovou benefisariu hamutuk xefe familia 67, Suku Lauhata benefisariu hamutuk xefe familia 67 no Suku Maubaralisa benefisariu hamutuk xefi familia 67.

Iha prosesu distribuisaun ne’e, kada xefi familia hetan masa 30 litru rua (2), inklui hetan mós pakote fini maka hanesan, fini batar, fini modo mutin, kanko, brinjela, alfase no lis. Aliende ida ne’e, sira mós hetan gembor 1, balde 1 nomós fatin ba rai aihan 2.

Jeralmente prosesu distribuisaun remata ona no maioria benefisariu sira kontente ho tulun ne’ebé organizasaun parseiru Australian Aid, OXFAM no KSI oferese. Nune’e, sira rekomenda iha futuru karik bele apoiu tan material ka nesesidade seluk ba agrikultór no komunidade kbi’it la’ek sira.

Natalia Taban, benefisariu husi Aldeia Raimei, Suku Vatovou, Postu Administrativu Maubara, Munisipiu Liquiça hateten, agradese tanba bele hetan apoiu fatin rai fini no promote sei uza sasan hirak ne’e ho kuidadu, nune’e bele utiliza ba tempu naruk. 

“Ba ha’u apoiu ida ne’e di’ak tebes, tanba durante ne’e ami laiha fatin ba rai fini, dala ruma balun uza de’it masa 5 litru no lata dosi nian hodi tau fini, maibé ida ne’e la garantia kualidade fini ba tempu naruk no fini ne’ebé ami rai iha kuantidade ne’ebé ki’ik, ne’e duni ho apoiu ida ne’e bele fasilita ona ami atu rai fini ho kuantidade ne’ebé naton,” deklara Natalia Taban.

Nia mós rekomenda katak, karik iha futuru bele apoiu mós bidon (silo), nune’e bele fasilita agrikultór sira hodi rai fini ho kuantidade ne’ebé bo’ot no apoiu tekniku balun hodi fasilita formasaun ba agrikultór sira kona ba oinsá atu halo identifikasaun ba fini ne’ebé di’ak, nune’e bele rai ba tempu naruk.

Fontes Notisia : Agrikultór Uma Ka’in 675 Husi Ermera-Liquiça Hetan Apoiu Fatin Rai Fini