Lauhata, 14 Setembru 2026 ─ Gabinete Prezidente Repúblika Demokratiku Timor Leste halo Lansamentu ba Ró ne’ebe hetan apoiu husi Prezidente Repúblika ba Grupu Eis- Prizoneru sira, tanba grupu eis-Prizoneru sira buka malu hodi hato’o sira pedidu ba Gabinete prezidente repúblika atu tulun sira liu-liu rendimentu ekonomia familia nian. Liu husi pedidu ida ne’ebe sira hato’o hetan ona resposta ba sira nia ezijensia no ohin loron halo lansamentu ba ró ba grupu ‘‘Moris Foun’’ iha Suku Lauhata, Postu Bazartete, Munisípiu Liquiça. Atu nune’e grupu moris foun ho membrus sira hala’o aktividades peska nian bele hakman no fortifika ba sira nia rendimentu ekonomia familiar.

Tuir intervista badak ne’ebe SISD Lauhata, hetan husi Teresa dos Santos Ximenes nu’udar Koordenadora Servisu Sosiadade Sivil no Servisu Asuntu Sosíal Prezidente Repúblika nian haktuir katak ajuda ida ne’e bazeia ba proposta ne’ebe ita nia eis- Prizoneru sira hato’o ba ita nia prezidente Republika hanesan dadur sira ne’e tinan barak sira iha fatin dadur no ohin loron sira livre ona, pozisaun nu’udar aman nasaun sei nafatin tau matan ba ita nia emar sira ne’ebe durante ne’e sai dadur. Objetivu husi apoiu ida ne’e mak atu hakma’an sira nia rendimentu ekonomia familia nian, no muda sira nia mentalidade atu labele komete hela deit ba aktus ne’e ho krime ruma ba oin. Osan ne’ebe maka apoiu husi Prezidente Repúblika hamutuk montante $ 5000,00 hodi hola ró inklui sosa ekipamentus peska sira seluk. Alende ida ne’e mos Xefe grupu Moris Foun ka Benifisiariu eis dadur Moises Fernandes, hau lori grupu nia naran hato’o ninia agradese wain ba Prezidente Repúblika no Ekipa husi Gabinete Prezidente ne’ebe mai halo ona lansamentu ba ró maiske kiik ami nafatin kontente hala’o ami nia aktividade ba oin.

 Iha tempu hanesan Lideransa Komunitariu Suku Lauhata Daniel dos Santos hateten katak, uluk nanain agradese ba Gabinete Prezidente Repúblika, liu husi Servisu Sosiadade Sivil no Asuntu Sosíal ne’ebe fo tulun ona grupu Moris Foun ne’ebe kompostu husi ema nain (5) sira hanesan ema eis dadur ne’ebe kumpri ona sira nia pena prizaun balun tinan (3) no balun (4) ka liu no oras ne’e sira livre ona. Ita agradese tanba sira iha inísiativa atu Hadia sira nia moris, sira harii grupu no sira halo proposta ba Prezidente Repúblika hodi hetan tulun atu sira bele sosa Ekipamentus hanesan peska nian hanesan ró jonson, rede nomos ekipamentus sira seluk.                     

Lia menon ba grupu sira maka jere ekipamentus sira ne’e kuidadu didiak ida ne’e hanesan hahú pontes dahuluk grupu tenki fiar malu no unidade nafatin atu nune’e grupu bele lao ho diak ba futuru.

Hakerek Nain                  : Ekipa SISD Suku Lauhata

Editor                               : Francisco dos Santos