LAUHATA, 05/08/2026 ─ Relasiona ho informasaun semana kotuk katak iha suku Lauhata Aldeia Pissu-Craic akontese asu tata labarik ida, no kazu refere familia vitima  evakua ba óspital hodi hetan tratamentu no asu ne’e mos komunidade oho hodi lori ba Saude animal Pekuariu no Vetenaria hodi halo teste ba asu ne’e no rezultadu hatudu pozitivu raiva. Ho ida ne’e maka Lideransa komunitariu Suku lauhata informa ba parte Diresaun Pekuaria no Veternaria Munisípiu Liquiça, orienta Ekipa Vasinador Raiva mai halo ona vasinasaun ba asu sira iha komunidade aldeia Pissu-Craic, hanesan Aldeia ne’ebe sai risku hodi prevene ba moras raiva. Alende ida ne’e iha komunidade balun la-kohi koopera atu halo vasinasaun ba sira nia asu, ho nune’e maka Ekipa mai halo fali vasina.

Liu husi bibain ne’e mos Ekipa SSID Suku Lauhata dada-lia badak ho Doutór Yosep Adedoni Lopes haktuir ’’katak iha Munisipiu Liquiça liu-liu iha Postu Bazartete, suku Lauhata, tekniku sira halo vasinasaun iha tinan 2024 no 2025 iha momentu ne’eba halo duni vasinasau maibe kobertura la to’o 100% tan ne’e mak asu barak mak la-hetan vasinasaun tan ne’e mak transmisaun moras ne’e liu husi asu sira nee’be la vasina wainhira tata malu maka asu ho pozitivu raiva ida ne’e sei apeita hamosu asu bulak maka hodi tata komunidade sira’’.

’’Husi departementu Pekuaria Veternaria, agora dadaun ne’e ita iha situasaun moras raiva ne’ebe tama ba kategoria endemia ne’e katak moras ne’e akontese iha ita nia munisipiu Liqui,ca no moras ne’e ba oin sei iha nafatin wainhira numeru asu la atinze 100%. Tan ne’e maka departementu Pekuária Vetenária iha estók vasinasaun, ita hanoin ba oin presiza halo planu vasinasaun rútina, liu-liu ba asu inan oan nurak sira, tanba moras raiva hanesan moras gonosia nia bele kona ema no nia mortalidade.’’ Ita halo ona Vasina durante tinan rua (2) maibe problema sidauk komprende didiak moras raiva ne’e rasik hodi sira la-kohi fo sira nia asu hodi vasina, karik menus husi informasaun no sosializasaun, no presiza duni Lideransa komunitariu sira oinsá sira fahe informasaun ne’e ba komunidade sira atu nune’e Ekipa tun mai halo vasina komunidade bele koopera.

Alende ne’e mos Xefe Suku Lauhata, Daniel dos Santos hateten katak ’’dalan atu prevene moras ravies ka asu bulak maka ita presiza halo vasina ba ita nia animal sira liu-liu asu no busa. Tanba ita hare’e moras rabies ne’ebe oras ne’e dadaun ataka ona iha ita nia rai, liu husi meius ida ne’e maka Lideransa Suku Lauhata servisu hamutuk ho Departementu Pekuária no Vetenária Munisipiu Liquiça, hala’o vasina ba asu sira ne’ebe mak sidauk vasina maibe tanba familia barak mak la-kohi koopera hodi halo vasina ba asu sira ne’e hodi prevene ba moras rabies ka asu bulak.’’

No Xefe Suku mos hato’o mensajen ba komunidade sira katak ita hare’e ba moras rabies ne’e bo’ot nia dalan di’ak liu maka halo prevensaun husi vasina, husu ba familia ida-idak ne’ebe hakiak asu ho busa ka lekirauk atu koopera nafatin ho doutor animal ka Ekipa vasinador Raiva atu ne’e bele halo vasina, tanba ita hatene katak tuir informasaun ne’ebe ita asesu moras rabies ne’e rasik la-iha aimoruk atu halo tratamentu ba ema ne’ebe hetan tata husi asu bulak, no husu ba komunidade wainhira  hetan tata husi asu tenki hakbesik-an ba Sentru saude hodi hetan tratamentu.

Hakerek Nain                 : Ekipa SISD Suku Lauhata

Editor                                : Francisco dos Santos